Hasi da merkealdia Hegoaldean ere, eta baikor azaldu dira dendariak

Asteazkenean hasi zen merkealdia Ipar Euskal Herrian, eta atzo, berriz, Hegoaldean. Baikor azaldu dira dendarien elkarteak, udazken epel eta lehorrak trabatutako salmentak orain egin ditzaketela uste dutelako. Lehen egunean ez dira garai bateko ilarak ikusi, baina egun arrunt batean baina jende gehiago zebilen hiriburuetako kale komertzialetan. Espainiako Gobernuak merkealdia urteko edozein sasoitan egiteko aukera eman zien dendariei 2012. urtean.

Lanean hildakoen kontagailua martxan jarri du Otxandioko istripuak

Basoko behargin bat hil da Bizkaian, arbola batek harrapatuta. 2015. urtean 54 hildako zenbatu ditu LABek, 2014an baino %54 gehiago. Irakurri gehiago

MassChallenge Biscay ekimena inpaktu handiko startup berritzaile bila

Bizkaiko Foru Aldundiak eta MassChallenge azeleragailu estatubatuarrak lankidetza-hitzarmen bat sinatu dute, eta haren barruan abiarazi dute MassChallenge-Biscay 2016 lehiaketa, enpresa berritzaile berriei zuzendutako deialdia. Irakurri gehiago. 

BILBOKO BURTSAREN BILAKAERA ATZO

Astearteko etenaldiaren ondoren, berriro galerak itzuli dira burtsetara. Bilboko burtsak %1,46 galdu zuen, eta antzeko kopuruak galdu zituzten Europako beste burtsek ere —Madrilek, %1,48; Parisek, %1,26; Eurostoxxek, %1,22—. Txinako Gobernuak hango burtsan zuzenean esku hartu izanak kezka eragin du merkatuetan.

Gobernuek suspertzea nabarmendu dute, eta sindikatuek prekaritatea

Krisia hasi zenetik langabezia gehien jaitsi den urtea dela diote Gasteizko eta Iruñeko agintariek. Irakurri gehiago

28.500 enpleguren suspertzea

Urtebetean 20.397 langabe gutxiago egotea ekarri du %3 inguruko hazkundeak Hego Euskal Herrian. 28.417 pertsona gehiago daude Gizarte Segurantzan izena emanda, eta jadanik 1.167.500 dira. Irakurri gehiago

Beste hilabete bat izango du Eroskik hitzartutako desinbertsioak egiteko

Bere zorra duten bankuekin akordio bat lortu du Eroskik. Horren bidez, hilabetez luzatu dute 300 milioiko desinbertsioak egiteko epea, otsailaren 29ra arte. Aktibo «ez estrategikoak» erosteko eskaintzak dituela ziurtatu du kooperatibak, baina operazioen «konplexutasunak» salmenta prozesua luza dezakeela uste du. Duela urtebete 2.650 milioiko zorra berregituratu zuen Eroskik bankuekin.